الإحتلال ؛ بقلم الشاعرة والكاتبة / أحلام السيد ( مصر 🇪🇬 )

 الإحتلال..💔

تعرف يعني إيه إحتلال..؟؟؟

الإحتلال هو إغتصاب أرضك ووطنك والمكان الي بتنتمى اليه والمحتل بفرض سلطته على الارض بتهديد العزل الامنين بالسلاح ..لكن كمان فيه إحتلال من نوع تاني !!

سمعت عن حرب الأعصاب..!!!

ده بقه افظع الحروب من غير ما يحتاج المحتل لبارود البنادق ولا لتخصيب اليورينيوم 

انك تكون مغصوب على وضع معين ده احتلال 

انك ممنوع تقول رايك ده احتلال 

انك نستسلم وتحاول تتجنب المشاكل ده احتلال.

انك تكون نفسك تصرخ وكاتم صرختك ده احتلال 

انك تكون نفسك تصرخ بصوت عالى وكاتم صرختك ده احتلال. 

انك تكون محروم من ابسط الاشياء الى ممكن تسعدك ده احتلال.

انك تكون ساكت طول الوقت وراسم على وشك ضحكة مجانين الى اكيد بقيت منهم بمرور الوقت ده احتلال. 

انك تكون محتاج لطوق نجاة ومش لاقيه ده احتلال. 

انك تحتاج لإيد تطبطب عليك وتمسح دمعتك ده احتلال. 

انك تكون عايش غريب بين اهلك وناسك ده احتلال. 

انك تكون بتستغل الضحك مع الناس علشان تبكي

 وماحدش واخد باله ده احتلال.

عاوزة اعرف حاجه محيراني !!

احنا ليه بنضحك على بعض تحت مسمى الحب  وبنستغل الحب الصادق اسوء استغلال.

وبنفتكر ان ده غباء من الطرف التاني وبنفضل نظهر عقدنا وامرضنا النفسية للناس الى بنحبها والمطلوب منهم يستحملوا ويصبروا علشان المركب تمشى ..

طب لما انا استحمل مين الى يتحملني

 مين يحس بيا مين يفهمني ؟؟؟

ما معنى الحب الحقيقي من وجهة نظركم؟

الحب وطن.. ارض.. انتماء.. دفىء.. عطف ..حنان..  عطاء بدون مقابل.. احساسك بالاخر ..

شعورك ان الشخص ده يهمك وانك مسؤول عنه.. 

وانك الوحيد الى تقدر تسعده.. انك تعمل المستحيل علشان ماتشوفش دمعه حزينه فى عنيه.. انك ممكن تموت لو عرفت انه بيتالم ..وشىء ممكن يجرحه افتكر ان ده ابسط تعريف لمعنى الحب الحقيقى

الاحتلال يا اصدقائي بيغزوا النفس البشرية بالتطرف بكل  انواعة الفكريه والثقافية

التطرف لا ينتمى لدين معين او جنسيات.. 

التطرف الحقيقى انك تشتت مفاهيم ومعتقدات راسخة فى العقل الواعى تحت اى مسمى كان 

يعنى مثلا ..انك تكون بتصوم  وبتحج كل سنه ودايما مواظب على الجماعه فى المسجد او الكنيسة وانت بينك وبين نفسك خراب ومش ملاحق على المعاصي وخزنتك حاتنفجر من الذنوب ومتهيألك انك تقمصت دور الواعظ الزاهد فى الدنيا ..

طب قولي بزمتك إزاى حاسمع لكلامك وإنت كده

 انت بجد مصدق نفسك وواعى لتصرفاتك ..

مين عينك حاكم وناهي لشرع الله فى الأرض

 وجعلت نفسك الحاكم بأمر الله ..

الله برىء منك ومن أمثالك مافيش دين على وجه الارض بيأمر بالتسلط والجبروت وفرض الرأي ..

أسفه لو هناك تطاول بالألفاظ ولكن بجد بجد هناك بنات وسيدات بتعانى من هؤلاء الشخصيات المريضة إلى فرضه سيطرتها على المجتمع تحت مسمى الزوج او الأخ اوالمسؤولين عن العمل بجد شىء مؤسف ..

انتم ليه لابسين قناع البراءة والسماحه ومخبين وجوهكم الحقيقية .

الاحتلال والتطرف وجهان لعمله واحده الا وهى النفس المريضة

صدقونى الإعتدال مطلوب فى كل شىء قليلٱ من الحرية الفكرية والثقافية تحت المتابعة والإستشارة حايخلق جيل قيم ذو مثل ومبادىء ويشعر بالإنتماء الحقيقى..

سيبني أقول رأى بصراحة مش يمكن تقتنع بيه بلاش نحجر على أفكار بعض خلينا نسيب بعض الحريات لبعض مش يمكن نتقارب فكريا وأفهمك وتفهمني ..

(فلسفه ممكن تكون غريبة على مجتمعنا العربى لكنها بجد إستنارة عقل مش دعوة للإنحلال ..)#

دعوة للحب الحقيقي . .دعوة للتسامح ..دعوة للأمل ..

خلينا نعيش الحياة صح بدون عقد أو كلاكيع ..

الحياة أبسط من كده بكتير أبسط من التجريح

 وحب الذات وفرض السيطرة..

خلينا نعيش الحياة مع الناس إلى بنحبهم لأنهم عاوزين يعيشوها معانا بس من غير. رجعيه 

مش معنى انك تكون  راجل وحاكم بيتك تقطع ألسنة أهله وتتجبر عليهم وتعاملهم وكأنك قراقوش فى زمانه ..لأ.....

الحرية فى معناها الحقيقي مش التبرج والسهر.. 

وقاعدة النميمة.. والشات بالساعات على النت

 والخروج والدخول بدون حساب.. لأ..

ماتفهمنيش غلط لو سمحت 

الحرية إنى أخاف الله وأكون رقيبة نفسي..

الحرية إنى أتكلم و أقول رأيي بصراحة وتحترمة ..

إني أحس إنى موضع إحترام عندك ..

الحرية إني أتعامل معاك بعفوية.. وإني مااخافش وأنا باتكلم وإنى حاسه إنك مش حاتعاقبنى قبل ما أخلص كلامى معاك لأنى المفروض إني باتعامل مع إنسان طبيعي.. مش جلاد..

أظن إن دي أبسط حقوق ليا عندك

 لو بتعاملني بشرع الله زي ما بتقول وتفهمني.. 

يقول الله عز وجل فى القرآن الكريم(وجعل بينكم مودة ورحمة)

كما يقول فى الإنجيل(الله محبه).

صدق الله العظيم

أعذروني للإستطالة ولكن هذا الموضوع حبيت طرحه عليكم للأخذ بالآراء مع إني عارفه إني حاتلقى هجوم شرس من القراء الرجال ولكن بجد بجد دي دعوة لإعادة ترتيب أوراقنا ممكن نتفق ..ممكن نختلف ..بس تفضل قلوبنا على بعض بجد..💕