( قضية شعب )
إديني من وقتك ساعه
اشرح لك فيها القضيه
وأقولك عاللي وصلنا
لأتعس حته في الدنيا
قضيه و كلنا احترنا
نواجه فتنه في الدنيا
قضيه و فيها أحوالنا
ما عجبت (رامي ) ولا ( سونيا )
قضية شعب صبار
كان أغنى شعب في الدنيا
ما قدرش عليه التتار
وانهزمت جيوشه ف ثانيه
والهكسوس كان هم و غار
أصل المصري حاجه تانيه
الشعب من حقه يعيش
ويرفع راسه فوق عاليه
الشعب مش عايز تهميش
وخيره مغرق الدنيا
شعب عنيد ما يجيش
بالضغط أو بحاجات تانيه
ما تخلي بالك يا حكومه
دي الأمه تعبت فاض بيها
ورجعت من تاني كورونا
إزاي نزيلها ونخفيها
الناس بتقولكو احمونا
عايزين حمايه ف أراضيها
وخايفه من بكره وبعدو
وانتو ولا حاسين بيها
والشعب بياكل في بعضو
من نار غلا مين يطفيها ؟
إحنا بلدنا كان فيها
الخير على أرضها وسام
والقمح مالي نواحيها
والناس عليه برا زحام
والقطن مالي حواريها
والسعر ما تقولليش كام
والفلاحين جوا عينيها
فرحه ونور ابتسام
وعيالنا ربنا يحميها
والكل عايش في سلام
ولما الظلم بات فيها
واشتقنا لحبة سلام
رجعنا تاني نعيد فبها
النصر باقي عليه كام
فاضل له سنه ولا اتنين
خلينا نتحرك قدام
ولإمتي حنبقى خاضعين
ونقوللهم كله تمام
ومن كل قرار خايفبن
مين فينا ناقص له علام ؟!
الفقير دايخ وتايه
والعزيز بنص عين
عامل نفسه مش شايف
جراح وآلام السنين
يا شعب ياللي كان داين
شعوب الأرض كلها
والجنيه طول عمره زاين
وفاق العملات كلها
يا بطل يا ابو صبر باين
قوللي إمتي نحلها
وتدور الدايرة ع الخاين
والدنيا تسمع كلها
ويبقى الحق ليك باين
وتنور مصر بأهلها
ويطرح زرع الجناين
يكفى الدنيا بأسرها
وكل فاسد يتحاكم
من اللي خربوا أرضها
بخراب عم المداين
و لسه قاعدين على تلها
يا شعب حر كان شايف
نور الضلمه بيقيد
يا شعب حر كان خايف
يعيش عيشة العبيد
يا شعب صانع قراره
لو زاد القهر عيد
عيد الكره من تاني
دانتا قلبك من حديد
يا شعب شارب مراره
النصر ما هوش بعيد
يا شعب لسه بيعاني
معدنك جواك فريد
كلمتك شايله الأماني
وفاتحه صغحه من جديد
بس اوعى تتهاون تاني
تاخدنا معاك لبعيد
في سكه ما لهاش آخر
تخلف بها المواعيد
بكره الفرح من تاني
يعم بلدنا ويزيد
ونسمع حكاوي أغاني
ونهضه بنشوفها أكيد
الله معاكي يا بلادي
حطينا الإيد في الإيد
وبدأنا نعمر الوادي
ويهون علينا الشديد
دا كل الخلق بتنادي
خلولي كل يوم عيد
ليست هناك تعليقات:
إرسال تعليق