(باللهجه المحكيه )
١٠٢ ............. أيام الزغر
بتتذكري ياخية ايام الزغر
كيف كنا ننام
ونفيق سوا
وندحرج الأحلام
والراعي يعزف نغمة حزن
عبواب هالايام
كنّا من عشيه
ناخد الخرجيي
نخبيها بطية الفستان
واعطيها الك
مع زهره وبوسي عخدك
ومسحة التحنان
شوفي
كيف كبرنا يا خية
وصار الورد يتغاوى عخدك
متل زهره بشجرة الرمان
كنتِ جميلي
وبعدك جميلي
متل ورد الروزخان
ياريت ماكبرنا وبقينا سوى زغار
متل نجمتين نروح ونجي
بقبة هالسما
ونخلي القمر
من هالنجمتين يغار
آه ليكي شو فعلت الأيام
شاب الشعر والضهر نحنا
والضغط والسكري
وضاعت الأحلام
والعصافير طيروا من العش
كلمن سكن بيتو مع ولادوا
انت وين وآني وين
مندور مندور
متل زوبعة بكعب هالفنجان
...
بقلم الأستاذه روز سليمان و جودات الغريب
كل الشكر للأستاذه روز للموافقه على النشر
... ٢٠١٩... سوريا ..... حمص
ليست هناك تعليقات:
إرسال تعليق