أرض الفراعنة ؛ بقلم الشاعرة المتألقة / حنان العجمى ( مصر 🇪🇬 )

(أرض الفراعنة)

يا أرض يا أُم الأجيال نَسلِك أبطال

فِيكِ شموخ نَاسِك دَا يهِد جبال

ابنِك رَاسُه مَرفوعَة عَرضِك دايْماً هَيصُون

نِسرِك بجناحُه حَامِيكِ وعَنِّك هَيشِيل أحمال 

أنا العاشق لِترابِك يَا سَمرَا يَا أُم الجَدايِل

فِيكِ زَتُونِك ونَخِيلِك على خِصرِك مَايِل

أَهواكِ يَا أُم العيون كَحِيلَة يَا بَلدِى بُكرَا تهُون

عَدُوِّك أحاربُه بإيدِى أَدَوَّر سَواقِيكِ لَا مُحَال

وِلَادِك رَاسيَة وفاهمة أفعالهُم

أغراضهُم عَطَشِك دا خَيَالهُم

يَا سِت الكُل عَارفِك وَاعيَة و صَحيَالهُم

نِيلِك دَا هَيفضَل يجرى يشَرَّب أميال 

بإيدى رَاح ازرَع ووِلَادِى الهِمَّة يَا خَال

هَبْنِى وأعَمَّر صَحَارِيكِ وأهرامِك شَاهدِين

واقفِين على بابِك نُحرُس صَاحيِين

بُرجِك شامِخ فى سَمَاكِ 

صقُورِك حَاميَة وهِيبِة أبو الهول

أَصل انتِ إلِّلى بَنَاكِ حَلَوَانِى 

مِين أَدِّك ولَا حَدْ يطُول

بَحرِك شَطِّك عنوانِك دَا جمالِك رَبَّانِى 

 وصفِك حُسنِك دَا دَلَال

شَمسِك يَا أَصيلَة تقُوم فَجرِيَّة والرزق حلال

يَا أَرض الفراعنة دَا خِيرِك غَطَّى وفاض عَليهُم

فَاتحَة دراعِك للضيف واللاجِىء فِيهُم

طريقِك مفتوح لِزُوَّارِك و كبَاشِك واقفِين

يَا عِينِى عَلِيكِ بفُستَانِك خَضَار زَارعِين

يَا حلوَة الحلوين افرَحِى بِوْلَادِك فَايْزِين

احنَا أحفاد الفراعنة خَطَاوِينَا حَاسبِين

الطَّرحَة التُّل على رَاسِك بَناتِك نَاسجِين

بَحِبِّك يَا أُم العيون السُّود وطَرف الرِّمش مَايِل

أَصل انتِ السَّنَد والظِّل والكُل هَيركَع يتحَايِل

وأنا رَافِع رَاسِى بِيكِ والكُل هَيْعِد جَمَايِل