#عم_احلمك_يا_لبنان
(حبيت عبر واكتب باللبناني وبين كل كلمة وكلمة دمعة وغصة)
عم احلمك يا لبنان...
يلي حكي عنو التاريخ وحكيوا عنو جدودي
وينك يا لبنان؟
ولا لبنان صار حكاية من اساطير الف ليلة وليلة اسمها
"لبنان مدمر"
لبنان يلي غناه كبار الفنانين
لبنان الرحابنة
لبنان فيروز و وديع والشحرورة
وينك يا سويسرا الشرق ؟
عملوا منك
لبنان الحرب والمأساة
لبنان الواسطة وقلّة الاستقرار والغش والطائفية والمناطقية
والشعب يلي قرف من الانتظار وفقد الامل بكل شي
صار يحلم بشقفة وطن
عم استحي اكتب
عم استحي افرح
عم استحي قول مرتاحة ومبسوطة
عم قضي يومي غاصة
موجوعة مقهورة حزنانة
على بلدي على اهلي على ناسي على صحابي
قلبي من جوا عم يتمزق لما اسمع انو اللبناني جاااااع
انو في ناس ببلدي مش لاقية لقمة الخبز
البلد نهار حترق و تشلخ وما بقى فيه شي حلو
والسياسي النصاب عايش مرتاح
وآخر همو لبنان كرشو مليان و ولادو بألف خير
عشت عمري بالغربة احلم بيوم العودة
وشو رسمت مشاريع وقصص وحكايات
عيشت حالي سنين بحلم كبير كنت مفكرة انو ممكن بيوم من الايام احملو معي علبنان وعيشو بالواقع ، لكن للاسف ...
لا الحلم رح يتحقق ولا الواقع ممكن يشبه الحلم
ورح ابقى احلمك يا لبنان
//زيزي الشامي سليمان//
ليست هناك تعليقات:
إرسال تعليق