ساعات بَكُون عايزة أعيش وأتمنى مَتِنتِهِيش
يا دُنيا مَتسِيبِينِيش بسمة أمل على مَفِيش
وساعات أتمنى أموت وأروح لسكون
بعيد عن الملكوت والكون والجبروت
ضحك على صمت على سكون
على دموع نازلة وعيون رايْحَة وجاية
وأهِى دنيا ماشية
وحكاية بتِتعاد هيَّ هيَّ ونفس الأسيَّة
عايشة لإيه ؟؟عايشة لِلِّى كُنت عايشة عشانه
وبِيه سنين عمرى ضايعة
عملتى إيه؟؟جَنيتِى إيه؟؟؟
غير ألم وعذاب ووحدة
وساقية دايرة ونفس حايرة
طول حياتِك ف عبادة
بِتتمَنِّى تحققى سعادة
من نِعَمْ ربِّنَا عليكى رضاكى بكل حال
حتى بالمستحيل والمُحال
قلبِك برَغم كل سوادُه وحُزنُه وشَرخُه وكَسرُه
لِسَّه فيه حِتَّة خضره صُغَيَّرَة
أَيْوه صَدَّقِى دِى هِبة رَبِّنا ليكى
براءتك إلِّلى جُوَّاكى نظرة عينيكى
أَيْوَه في إلِّلى شايفينها فى إلِّلى عارفينها
لكن زَيِّك عايشين فى دُنيا مَبتِرحَمش
وناس مَبِتخَافش لا خالق ولا مخلوق
عقارب ساعة واقفة
وأرقام مَمسوحة ووجوه مَمسوخة
كوكب تانى دا ف أحلامِك
عُمر تانى دِى أوهامِك
جُوَّه أحلامِك وخيالك البعيد
لِسَّه فى طفلة عنيدة
بِطِبَاعها الرقيقة قوة غريبة
نابعة من بُركان انهيار رافضة انكسار
قوة تهِد جبال راجعة ومِش خاضعة
عيون مفتوحة وبسمة مرسومة
وخطوة محسوبة
نَبت بتِزرَعُه وشوك بتِخلَعُه
ولون تانى بشكل تانى
يِشبِه الأوَّلانِى لَكِنُّه تانى
وفكر بادِى بشكل عادى
وتاركَه ماضى ف صندوق رمادى
شِوَيِّة ورق على حَبِّة عناوين صور ..فساتين
وأصوات لناس كانوا موجودين
درس اتعَلِّمِتُه وفهمِتُه
مكتوب على جبِينها وعيونها شافِتُه
يا دُنيا يا فانية سِيبيها لِسَّه باقية
وبأملها عايشة بِدَمعَة بايْتَة وضحكة بادية
ليست هناك تعليقات:
إرسال تعليق