بقلم الشاعرة /حنان فاروق العجمي
قلوب كتير بتحب
غير قلبي أنا شكل تاني
لَمَّا يعشق قلب
يِتْكَتَبلُه يعيش أماني
يهوى حتى سكوتُه
يجري يقدِّم وعودُه
مُنايا جنبي وجُودُه
وحلمِي مِنُّه القُرب
كلامُه ياخُد حناني
أهدِيه روحِي وزماني
حروفي وأغاني الحب
قلبي يعشق جنونُه
أحلِف بعُمري لَصُونُه
أَفدِي دَمع عيونُه
لو رِمشُه شاوِر لِيَّا
تِنَوَّر شموع ليالِيَّا
يا حبيبي تعالى ندُوب
فرحتنا لِسَّه يَدُوب
نسقيها شُوق بِإدِينا
وقمرنا شاهِد علينا
النسمة توَشوِش هوانا
الشمس تدَفِّي لُقانا
كتابي أوراقُه ما تِكفِي
تِوْصِف مشاعري ولَهفِي
حُبَّك بلسم يِشفِي
جروحي ونار بِتكوي
يا رب اسمع دُعايا
هُوَّا كُل رَجايَا
ولا غِيرُه بالكون دَوايا
يا عالِم جرح القلوب
عَن حُبُّه أحلِف ما أتُوب
ليست هناك تعليقات:
إرسال تعليق