كُنت أقدَر ما اتكَلِّم كُنت أقدَر ما اتوَهِّم
إن كُنت سِكِت
كُنت بتِحكِى وكُنت بتِشكِى وكُنت اتأَلِّم
عِشت خيال عِشت الصَّمت
كان صوت جُوَّايا بيقول انهارِى
لِيه اتحَمِّل فُقت تعِبت
كُنت هادى وشكلَك عادى وقلبَك فاضى
لا كُنت شَبَهُه ولا كان شَبَهِى!!
حتى حياتُه روتينها مُمِل ..لكن استَسلِمت
معقول قلبين مختلفين نتقابل!!!
لكن لِدَقة قَلبُه سمِعت
رُوحُه سَكنِت رُوحِى!!
و بسَكَن الأرواح أنا صَدَّقت
كان حرف يقولُه كَإِنُّه حكاية!!
كُنت انسِج لَحن بداية!!
على شَطِّى وحَبَّات الرمل تجرى بإيدى
اسقيها المَيَّه تنزل عَ الصَدَفَة وكإِن السَّهم
وقلبَها يتقَبِّل ويضُم
نجمة بحر لَمَسها هواه
ولحُب البحر كانت بتحِن
مُوجُه رَماها لفوق
بنور الشمس نَوَّرِت شافها اتجَن
موجَة للسما عالية صوتها يرِن
نامِت على وِش المَيَّه أَصلَها شَالِتها بحنِّيَّة
لكن البحر عَشَان غَدَّار وعندُه كتير أسرار
خاف ورماها على صخرُه
والموج نَفِّذ ودا كان أمرُه
اعترَض الموج على قرارُه
لإنُّه عارِف بَحرُه وأحوالُه
دَوَّامَاتُه أَخَدِتها ولبعيد وَدِّتْهَا
ومُوجُه حَب طَلِّتها
اترَجَّى البحر يسِيبها عايْمَة
مُتَأَكِّد من مَحبِّتها
ومَرَّة الموج ياخُدْها لفوق ومَرَّة ينَزِّلها لتحت
فاكِر هَترضَى بقسمتها
أَتارِى النجمة فهمِت
لَمَّا الصخرة براسها خَبَطِتها
ومن حلمها صَحِّتْها
رِسيِت عَ الشَّط الموج يبعِد وهنا مكانها
الموج يقرَّب وهنا عنوانها
تِفضَل عَايْمَة عَ المَيَّه دِى مِشْ أحلامها
الموج ينهار و ف أمرَها يحتار
النجمة اتحَرَّكِت و عَ البحر اتمَرَّدِت
والموج مشغول وخايف وعجول
لازِم يختار يسكُن شَطَّها يَاخُد قرار
البحر ومُوجُه حياة لكن مِشْ سهلة
والنجمة بريئة وهايْمَة
الرمل بَنى البيت وصَدَف البحر أساس
ومكانها فيه عالى وعَ الرَّاس
والموج ثابت مكانُه وهايِب
يحلم بالنجمة وف يوم يكونوا حبايب
وقلبُه عند قلبها دايِب
ليست هناك تعليقات:
إرسال تعليق