بقلم : الزروقي جواد
طلبتك يالبحر
من بعد ماحار بيا الأمر
وتقضى ليا الصبر
واش تقدر توصل سلامي
لا غزالي لي ساكن ورا البحر
ولا عليا غادي تعطل
شاف فيا نطق وگال
صافي تقدو الكتاف
گد القب گد السطل
هذا راه سيدك البحر
شانو عظيم وعالي
عامر فالصيف والليالي
ولا داير راسك عليا
حمق و بوهالي
راه وخا تكون عوام
معايا خاصك ترد البال
فالكلام والعومان
ماشي غير أجي وتلاح
وگول أنا سباح
غير هني بالك ورتاح
رتاح وزيد رتاح
راه مايا مالح كيف الملاح
إلا بغيتي تشرب
شوف ليك شي گراب
هاز گربة ومعلق قراب
إيوا كن واعي ومصواب
محبوب عند الناس
وخا مايكون عندك حباب
كلشي يفتح ليك الباب
ونا غادي نوصل سلامك
حيت حاس بهمك وأحلامك
كيف ماكان مقامك وشانك
وخا نتى ما فيك صواب
دخلتي نيشان........
بلا ما تدق فالباب
سوق الأربعاء الغرب
ليست هناك تعليقات:
إرسال تعليق