الزمكان,,,,,,,,,,,بقلم علي ابوالمجد

أنا اللي أول وآخر في السديم الفاضي

أنا الضعيف اللي قادر يحتوي الماضي

أنا اللي ماسك ، خيوط اللعبة في إيديا

وبخفة الحاوي .. 

وسر (واش يا واش)

با اخلق عوالم جديدة ،

من خطوط الماتريكس

طالع لسابع سما .. 

من سلمة لسلمة

رحلة عذاب مؤلمة .. بتردني إنسان

صمتي مخيف إنما ..

ف إيديا ناي ، كلما

ترويه شفاهي دِما .. بيخضّر الدبلان

وانتي حقيقتي اللي كان ..

خيالي .. ما طالهاش

مدي لي إيدك .. أشدك ، برة شرنقتك

وصدقيني .. دا انا اللي ياما صدقتك

لو كان عيوني بجد اتشكلوا من طين

ها تفسري لي ازاي

إني ومن غير عين

قادر أشوف ، الندى 

حبات على النهدين

واحنا ما بينا : سور 

والواح قزاز وبحور

وقبور ، وشاهد زور .. بضحكة كدابة

بيقدم الأيام .. 

ف طباق عجب بنّور

آدي الضلام ، والنور

أخوات توائم ، لكين .. البطن ، قلابة

والحزن دبابة

والدنيا غابة ملكها سيدي عَب رحمن

فسيبي  نفسك ..

وعودي معايا للمستقبل

خليني أقبل نعيم

الضلمة والأحزان

خلي هدير الآه .. 

يحيى ف قلبي سليم

وصلي ليا

من النية ، للتسليم

خلي دموعنا تكون ..

أحن ، م الخشخاش

يا هل ترى كنت ايه ..

ف السابق اللي ما جاش؟!!

ماموث نباتي وديع ..

خوفك ، عَملني إله

ولا فراشة ، 

جناحها .. فجَّر البركان

أعلام دول تترفع 

وغيرها ، تتنكس

وانتي وانا يا حبيبتي .. 

أسرى ل ( الزمكان )

بينا وبين الخلود .. 

نظرة ، ما تنشافشي

بينا وبين الجنون .. 

دمعة ، ما تنشفشي

بينا وبين نفسنا ..

أيام ما بنعيشهاش